शिक्षक ते संस्थाचालक, संघर्षातून घडलेले नेतृत्व – नरसू पाटील सरांचा पक्षविरहित गौरव; विजय भोईर-विकास भोईर यांच्याकडून मानाचा मुजरा.

हिंदुसम्राट न्यूज 

दिनांक :- 20/6/2026

शिक्षक ते संस्थाचालक, संघर्षातून घडलेले नेतृत्व – नरसू पाटील सरांचा पक्षविरहित गौरव; विजय भोईर-विकास भोईर यांच्याकडून मानाचा मुजरा.

पत्रकार / पूजा चव्हाण.

उरण, दि. 20 जून 2026 (प्रतिनिधी) :  समाजात अशी काही व्यक्तिमत्त्वे असतात की त्यांची ओळख एखाद्या पदापुरती किंवा व्यवसायापुरती मर्यादित राहत नाही. त्यांच्या कार्याचा विस्तार शिक्षण, समाजसेवा, विकास, मैत्री, नेतृत्व आणि माणुसकी या सर्व क्षेत्रांमध्ये झालेला असतो. आदरणीय श्री. नरसू पाटील सर हे अशाच प्रेरणादायी, कर्तृत्ववान, संघर्षशील आणि सर्वसामान्य माणसाच्या मनात अढळ स्थान निर्माण करणाऱ्या व्यक्तिमत्त्वांपैकी एक आहेत, असा गौरव उरणचे माजी जिल्हा परिषद सदस्य विजय भोईर आणि बीएसएस कंपनीचे मालक विकास भोईर यांनी केला आहे.

आम्ही विजय भोईर आणि विकास भोईर, जरी भारतीय जनता पक्षाचे कार्यकर्ते आणि विचारांचे पाईक असलो, तरी या शुभेच्छा पूर्णपणे पक्षविरहित भावनेतून व्यक्त करीत आहोत, कारण एखाद्या व्यक्तीचे समाजासाठीचे योगदान हे कोणत्याही राजकीय चौकटीपेक्षा मोठे असते, असे त्यांनी स्पष्ट केले. नरसू पाटील सर यांचे कार्य हे शिक्षण, समाजहित आणि विकास यासाठी समर्पित असल्याने त्यांचा गौरव हा पक्षीय नव्हे तर सामाजिक कर्तव्य आहे, असेही भोईर बंधूंनी नमूद केले.

नरसू पाटील सर यांचा जीवनप्रवास हा संघर्षातून उभ्या राहिलेल्या यशाचे जिवंत उदाहरण आहे. एक सामान्य शिक्षक म्हणून त्यांनी आपली कारकीर्द सुरू केली. विद्यार्थ्यांना शिक्षण देताना त्यांनी केवळ अभ्यासक्रम शिकवला नाही, तर विद्यार्थ्यांच्या जीवनाला दिशा दिली, त्यांच्यामध्ये आत्मविश्वास निर्माण केला आणि त्यांना मोठी स्वप्ने पाहण्याची प्रेरणा दिली. त्यांनी कार्य केलेली संस्था म्हणजे जवाहरलाल नेहरू पोर्ट विद्यालय (जेएनपीटी विद्यालय). या संस्थेमध्ये शिक्षक म्हणून काम करताना त्यांनी आपल्या प्रामाणिकपणा, मेहनत, व्यवस्थापन कौशल्य आणि शिक्षण क्षेत्रातील दृष्टीकोन यामुळे सर्वांचा विश्वास संपादन केला. ज्या विद्यालयात शिक्षक म्हणून कार्य केले, त्याच विद्यालयाच्या दोन्ही शाळांच्या संचालनाची धुरा सांभाळण्याचा मान मिळवणे ही अत्यंत अभिमानास्पद बाब आहे. आज जेएनपीटीच्या दोन्ही शाळा त्यांच्या नेतृत्वाखाली चालवल्या जात आहेत. हा प्रवास म्हणजे एका शिक्षकाच्या कर्तृत्वाला मिळालेली सर्वोच्च सामाजिक मान्यता आहे.

महाराष्ट्रात शैक्षणिक क्षेत्रात अग्रगण्य असणाऱ्या साई संस्था (ट्रस्ट) डोंबिवली यांच्या शैक्षणिक संकुलाच्या शिरपेचात 2026-27 या शैक्षणिक वर्षापासून जेएनपीए मराठी माध्यम स्कूलच्या रूपाने सन्मानाचा तुरा खोवला गेला आहे. या विद्यालयाचा कारभार आता साई संस्थेच्या हातात आला असून जेएनपीए प्रशासनाने दि. 30 एप्रिल 2026 रोजी याबाबतची ऑर्डर संस्थेचे अध्यक्ष नरसू पाटील यांच्याकडे सुपूर्द केली आहे. साई ट्रस्ट आणि जेएनपीटी विद्यालय शेवा यांच्या माध्यमातून हजारो विद्यार्थ्यांना शिक्षणाची संधी मिळाली आहे.

कोकण शिक्षक मतदारसंघाच्या निवडणुकीत उमेदवारी दाखल करून त्यांनी शिक्षकांच्या प्रश्नांना आवाज देण्याचा प्रयत्न केला. काही मतांच्या फरकाने पराभव झाला असला, तरी त्यांनी कधीही निराश न होता आपले सामाजिक आणि शैक्षणिक कार्य अधिक जोमाने सुरू ठेवले. शिक्षकांच्या सेवा विषयक प्रश्नांपासून विद्यार्थ्यांच्या शैक्षणिक गुणवत्तेपर्यंत प्रत्येक विषयावर त्यांनी भूमिका घेतली आहे. अन्यायाविरुद्ध आवाज उठविणे हे त्यांच्या स्वभावातच आहे. समाजातील कोणत्याही व्यक्तीवर अन्याय झाला तर ते नरसिंहाप्रमाणे उभे राहतात.

शिक्षण क्षेत्राबरोबरच विकास क्षेत्रातही त्यांनी आपला ठसा उमटवला आहे. आई इन्फ्रा या नावाने त्यांनी महाराष्ट्र आणि गोवा राज्यात विकासकामांची नवी ओळख निर्माण केली आहे. सर्वसामान्य माणसासाठी कमी किमतीत, चांगल्या दर्जाची घरे आणि इमारती उपलब्ध करून देण्याचे महत्त्वपूर्ण कार्य त्यांनी केले आहे. आई इन्फ्रा या नावाने त्यांनी विकासकामांमध्ये विश्वास, गुणवत्ता आणि पारदर्शकता जपली आहे.

नरसू पाटील सर यांच्या व्यक्तिमत्त्वाचा आणखी एक महत्त्वाचा पैलू म्हणजे त्यांची माणुसकी. ते हसतमुख आहेत, सर्वांना आपलेसे करणारे आहेत आणि संकटात आधार देणारे आहेत. त्यांच्या मित्रपरिवारात त्यांना “मैत्रीतील राजा माणूस” म्हणून ओळखले जाते. गरिबीची जाणीव असलेले नेतृत्व म्हणून ते समाजामध्ये विशेष आदराने पाहिले जातात.

आज नरसू पाटील सर हे केवळ शिक्षक नाहीत, केवळ संस्थाचालक नाहीत, केवळ विकासक नाहीत; तर ते एक विचार आहेत, एक प्रेरणा आहेत आणि समाजासाठी झटणाऱ्या नेतृत्वाचे प्रतीक आहेत. त्यांच्या पुढील सर्व शैक्षणिक, सामाजिक आणि विकासात्मक उपक्रमांना भरघोस यश लाभो. त्यांनी समाजासाठी असेच कार्य करत राहावे. त्यांना उत्तम आरोग्य, दीर्घायुष्य आणि अधिकाधिक यश प्राप्त व्हावे, हीच मनःपूर्वक सदिच्छा विजय भोईर, माजी जिल्हा परिषद सदस्य रायगड, माजी उपसभापती पंचायत समिती उरण तथा त्यांचे जुळे भाऊ विकास भोईर, विजय विकास सामाजिक संस्था उरण आणि समस्त मित्रपरिवार, शिक्षकवर्ग, विद्यार्थी, हितचिंतक व नागरिक यांच्या वतीने व्यक्त करण्यात आली आहे.