हिंदुसम्राट न्यूज
दिनांक :- 29/6/2026
इंदिरा गांधी रुग्णालयात पल्स पोलिओ मोहिमेला उत्स्फूर्त प्रतिसाद; १७०६ चिमुकल्यांना दोन थेंब अमृताचा डोस.
पत्रकार / पूजा चव्हाण.
उरण :- राष्ट्रीय पल्स पोलिओ मोहिमेअंतर्गत इंदिरा गांधी रुग्णालयात आयोजित विशेष लसीकरण सत्रात ० ते ५ वयोगटातील तब्बल १७०६ बालकांना पोलिओ प्रतिबंधक लसीचे दोन थेंब पाजण्यात आले. ‘दोन थेंब जिंदगी के’ या घोषवाक्याला प्रतिसाद देत पालकांनी मोठ्या संख्येने मुलांना घेऊन रुग्णालयात गर्दी केली होती. रविवार, २८ जून २०२६ रोजी देशभरात पल्स पोलिओ मोहीम राबवण्यात आली.
या पार्श्वभूमीवर इंदिरा गांधी रुग्णालयात सकाळपासूनच लसीकरण बूथवर लगबग दिसून आली. नोंदणी कक्ष, प्रतीक्षा कक्ष आणि लसीकरण कक्ष अशी तीन टप्प्यांत व्यवस्था करण्यात आली होती. वैद्यकीय अधिकारी, परिचारिका, आशा सेविका व आंगणवाडी कार्यकर्त्यांनी दिवसभर अविरत सेवा दिली. टेबलवर ठेवलेल्या निळ्या रंगाच्या व्हॅक्सिन कॅरियरमधून थंड साखळी राखून लस पुरवण्यात येत होती. लहान बाळांना औषध पाजताना पालकांच्या चेहऱ्यावर समाधान आणि कर्मचाऱ्यांच्या चेहऱ्यावर कर्तव्यपूर्तीचा आनंद दिसत होता. मोहिमेच्या यशस्वीतेसाठी रुग्णालयाचे वैद्यकीय अधीक्षक डॉ. बाबासो काळेल यांच्या मार्गदर्शनाखाली सर्व वरिष्ठ डॉक्टर, नर्सिंग स्टाफ, फार्मासिस्ट व प्रशासकीय कर्मचारी दिवसभर उपस्थित होते. यावेळी उरणच्या नगराध्यक्षा भावनाताई घाणेकर, नगरसेविका प्रार्थना म्हात्रे, नगरसेविका वंदना पवार आणि नगरसेविका नायदा ठाकूर यांनीही लसीकरण केंद्राला भेट दिली.
भावनाताई घाणेकर यांनी स्वतः लहान मुलांना लस पाजून मोहिमेचा शुभारंभ केला, तर प्रार्थना म्हात्रे, वंदना पवार आणि नायदा ठाकूर यांनी पालकांशी संवाद साधून पोलिओ लसीचे महत्त्व पटवून दिले. “पोलिओचे उच्चाटन झाले असले तरी शेजारील देशांमध्ये रुग्ण आढळत आहेत. त्यामुळे धोका टाळण्यासाठी प्रत्येक बाळाला लस देणे आवश्यक आहे,” असे आवाहन यावेळी करण्यात आले. २८ जून हा बूथ दिवस म्हणून पाळण्यात आला. त्यानंतर २९ जून ते ३ जुलै या कालावधीत आरोग्य कर्मचाऱ्यांच्या ५११ हून अधिक पथकांमार्फत घरोघरी जाऊन सुटलेल्या मुलांचे लसीकरण केले जाणार आहे. बस स्थानक, रेल्वे स्थानक, वीटभट्ट्या व भटक्या वस्त्यांमधील मुलांसाठी ट्रान्झिट व मोबाइल टीम्स कार्यरत राहणार आहेत. ६ जुलै रोजी ‘बी-टीम’च्या माध्यमातून राहिलेल्या मुलांना लस दिली जाईल. इंदिरा गांधी रुग्णालयात आलेल्या अनेक मातांनी नवजात बालकांनाही लस दिली. “पहिल्याच दिवशी लस मिळाली, त्यामुळे निश्चिंत वाटतंय,” अशी प्रतिक्रिया एका मातेने दिली. रुग्णालयाच्या आवारात लावलेल्या जनजागृती फलकांमुळे व आशा सेविकांनी केलेल्या दारोदारी संपर्कामुळे पालकांमध्ये जागरूकता वाढल्याचे दिसून आले. जिल्ह्यात यंदा २ लाख ३४ हजार ५६१ बालकांना लस देण्याचे उद्दिष्ट ठेवण्यात आले आहे. रायगड जिल्हा प्रशासनाने या मोहिमेसाठी १९८० स्थिर बूथ, ११७१ घरोघरी जाणारी पथके, ७५ ट्रान्झिट टीम व ४५ मोबाइल टीम्स तैनात केल्या आहेत. जिल्हाधिकाऱ्यांनी कोणताही पात्र बालक लसीपासून वंचित राहणार नाही याची दक्षता घेण्याचे आदेश दिले आहेत. “पोलिओ विरुद्धच्या लढाईत आपण यशस्वी झालो आहोत, पण नियमित लसीकरणाने बाळांचे भविष्य सुरक्षित करता येते,” असे आरोग्य विभागाने स्पष्ट केले. इंदिरा गांधी रुग्णालयातील १७०६ बालकांचे लसीकरण हे या मोहिमेतील महत्त्वाचा टप्पा ठरले असून, उर्वरित मुलांपर्यंत पोहोचण्यासाठी पुढील आठवडाभर आरोग्य यंत्रणा सज्ज राहणार आहे.
