हिंदुसम्राट न्यूज
दिनांक :- 31/5/2026
"मेल्यानंतरही सन्मान नाही : उरणच्या स्मशानात कुत्री तोडतायत प्रेताचे लचके, १२ नगरसेवकांचा माणुसकीला विरोध!"
पत्रकार / पूजा चव्हाण.
उरण, 30 मे 2026 : "मेल्यावर तरी माणसाला शांती मिळेल" ही उरणकरांची अपेक्षा आता मातीमोल झाली आहे. उरण बोरी स्मशानभूमीत मृतदेहाची अक्षरशः विटंबना सुरू आहे. ना वॉचमन, ना स्वच्छता. कुत्री उघड्यावर पडलेल्या मानवी अवयवांचे लचके तोडतायत. फोटो बघून काळीज पिळवटतं.
कालच्या सर्वसाधारण सभेत गटनेते अतुल ठाकूर आणि नगरसेविका प्रमिला पवार यांनी हा संतापजनक प्रकार डोळ्यात पाणी आणून मांडला. सभागृह सुन्न झाले. नगराध्यक्षा भावनाताई घाणेकर यांनी स्वतः विषय मांडून "सामाजिक भान ठेवा" अशी कळकळीची विनंती केली.
पण इथेच धक्का बसला. माणुसकीच्या या प्रश्नावरही भाजपच्या १२ नगरसेवकांनी विरोधाचा झेंडा फडकावला. मेलेल्या माणसाच्या टाळूवरचं लोणी खाणारी ही कोणती वृत्ती? मतदारांनी निवडून दिले ते प्रेतांची विटंबना बघत बसायला का?
*उरणकरांचा सवाल: प्रशासन झोपलंय का मेलंय?*
1. स्मशानात वॉचमन नेमायला सरकारकडे पैसा नाही का?
2. भटकी कुत्री आवरण्याइतकीही लायकी पालिकेत उरली नाही का?
3. मृतदेहाला अग्नी देण्यासाठी स्वच्छ जागा मिळणे हा मूलभूत अधिकार नाही का?
4. डोळ्यासमोर प्रेतांचे लचके तोडले जात असताना विरोध करणारे १२ नगरसेवक कोणाच्या इशाऱ्यावर नाचतायत?
आज उरणची जनता पेटून उठली आहे. "मेल्यावर तरी आम्हाला कुत्री खाणार नाहीत याची गॅरंटी द्या" अशी आर्त मागणी नागरिक करत आहेत. हा विरोध लोकशाहीच्या थोबाडीत मारलेली चपराक आहे.
*जनतेचा अल्टिमेटम:*
1. 48 तासात स्मशानभूमीत वॉचमन हजर करा.
2. भटक्या कुत्र्यांचा कायमचा बंदोबस्त करा.
3. स्मशानभूमीची दुरुस्ती करून माणसासारखे अंत्यसंस्कार होतील अशी व्यवस्था करा.
4. या बेशरम दुर्लक्षाला जबाबदार अधिकाऱ्यांना तात्काळ निलंबित करा.
उरण नगरपरिषदेच्या अधिकाऱ्यांनो, खुर्च्या उबवणं बंद करा. स्मशानात जाऊन एकदा त्या कुत्र्यांनी तोडलेल्या अवयवांकडे बघा. कदाचित तेव्हा तुमची झोप उडेल. जनतेच्या संयमाचा अंत पाहू नका.
