हिंदुसम्राट न्यूज 

दिनांक :- 20/5/2026

कामोठ्यात रंगला ‘मिनी महाराष्ट्र केसरी’चा थरार : परेश ठाकूर यांच्या वाढदिवसानिमित्त भव्य कुस्ती स्पर्धेला हजारोंची गर्दी, सिकंदर शेख ठरला विजेता.

पत्रकार / पूजा चव्हाण.

महाराष्ट्राच्या पारंपरिक कुस्ती संस्कृतीचा थरार, हजारो क्रीडाप्रेमींची उपस्थिती, मातीतल्या लढतींचा जल्लोष आणि भव्य-दिव्य आयोजनाचा दिमाख अशा उत्साहपूर्ण वातावरणात कामोठे येथे “मा. श्री. परेशशेठ ठाकूर केसरी २०२६” ही जंगी कुस्ती स्पर्धा शानदारपणे पार पडली. भाजपचे युवा नेते, पनवेल महापालिकेचे माजी सभागृह नेते व विद्यमान नगरसेवक परेश ठाकूर यांच्या वाढदिवसानिमित्त भारतीय जनता युवा मोर्चा कामोठे आणि रायगड जिल्हा कुस्ती असोसिएशन यांच्या संयुक्त विद्यमाने या स्पर्धेचे आयोजन करण्यात आले होते. कामोठे सेक्टर ०६ येथील लोकनेते रामशेठ ठाकूर विद्यालयाच्या भव्य मैदानावर पार पडलेल्या या स्पर्धेने अक्षरशः “मिनी महाराष्ट्र केसरी”चा अनुभव उपस्थितांना दिला.  

या कुस्ती सामन्यांचे उद्घाटन माजी खासदार लोकनेते रामशेठ ठाकूर, मावळ मतदार संघाचे खासदार श्रीरंग बारणे, भाजपचे राज्य परिषद सदस्य अरुणशेठ भगत यांच्या हस्ते झाले. यावेळी प्रमुख मान्यवर म्हणून राज्याचे मत्स्यव्यवसाय आणि बंदरे विकास मंत्री नितेश राणे, भाजपचे महाराष्ट्र प्रदेश सरचिटणीस आमदार निरंजन डावखरे, भाजपचे महाराष्ट्र प्रदेश सचिव आमदार प्रशांत ठाकूर, आमदार महेश लांडगे यांची उपस्थिती लाभली. तसेच प्रमुख पाहुणे म्हणून भाजपचे जिल्हाध्यक्ष अविनाश कोळी, नवी मुंबई महापालिकेच्या माजी महापौर सुजाता पाटील, माजी महापौर नितीन पाटील, रायगड जिल्हा पनवेल पंचायत समितीच्या सभापती रंजना वास्कर, माजी उपमहापौर प्रमिला पाटील, उपसभापती भूपेंद्र पाटील, खालापूर पंचायत समितीचे सभापती कृष्णा पारंगे, खोपोली महापालिकेचे माजी उपनगराध्यक्ष विक्रम साबळे, पनवेल महापालिकेचे माजी विरोधी पक्षनेते प्रितम म्हात्रे, माजी सभागृहनेते ऍड. प्रकाश बिनेदार, माजी स्थायी समिती सभापती बबन मुकादम, माजी महिला व बाल कल्याण सभापती ममता म्हात्रे, पेण नगरपरिषदेचे गटनेते अनिरुद्ध पाटील, शिवसेनेचे जिल्हाप्रमुख रामदास शेवाळे, माजी नगराध्यक्ष संदीप पाटील, माजी नगराध्यक्ष सुनिल घरत, भाजपच्या जिल्हा सरचिटणीस चारुशीला घरत, महिला मोर्चाच्या जिल्हाध्यक्षा प्रिया मुकादम, युवा मोर्चाचे जिल्हाध्यक्ष आनंद ढवळे, भाजपचे खारघर मंडल अध्यक्ष प्रवीण पाटील, कळंबोली मंडल अध्यक्ष अमर पाटील, पनवेल शहर मंडल अध्यक्ष सुमित झुंझारराव, नवीन पनवेल मंडल अध्यक्ष दशरथ म्हात्रे, उत्तर मंडल अध्यक्ष दिनेश खानावकर, कुस्तीगीर संघटनेचे बळीराम पाटील, आयोजक नगरसेवक हॅप्पी सिंग, भाजपचे उत्तर रायगड जिल्हा उपाध्यक्ष मयुरेश नेतकर, सुप्रसिद्ध कुस्तीपटू आणि प्रशिक्षक रुपेश पावशे, कामोठे महिला मोर्चाच्या अध्यक्षा वनिता पाटील, कामोठे युवा मोर्चा अध्यक्ष तेजस जाधव यांच्यासह राज्यातील ज्येष्ठ पैलवान, विविध क्षेत्रातील मान्यवर उपस्थित होते. यावेळी युवानेते परेश ठाकूर यांचा अभिष्टचिंतन सोहळा मोठ्या उत्साहात संपन्न झाला आणि हजारो मान्यवरांनी व नागरिकांनी त्यांना शुभेच्छा दिल्या.  

या प्रसंगी बोलताना मंत्री नितेश राणे यांनी आपल्या खास शैलीत राजकीय विरोधकांवर जोरदार निशाणा साधला. ते म्हणाले की, “माझा आणि कुस्तीचा थेट संबंध दिसेल असे वाटत नाही, कारण आमचा आखाडा वेगळा आहे. आमचा आखाडा हिंदुत्वाचा असून आम्ही रोज ‘हिरवे साप’ ठेचतो.” पुढे ते म्हणाले की, “साधारणपणे एवढी भव्य कुस्ती स्पर्धा फक्त पश्चिम महाराष्ट्रातच पाहायला मिळते असा समज आहे. मात्र, आज कामोठ्यात झालेली ही गर्दी आणि आयोजन पाहिल्यानंतर आम्हीही पश्चिम महाराष्ट्रापेक्षा कुठेही कमी नाही, असाच स्पष्ट संदेश परेश ठाकूर यांच्या माध्यमातून गेला आहे.” एवढ्या मोठ्या प्रमाणावर जनसमुदाय एकत्र येणे हे परेश ठाकूर यांच्या नेतृत्वाची वाढती ताकद दाखवणारे आहे, असे सांगत त्यांनी परेश ठाकूर यांचे भविष्य उज्वल असल्याचे सांगून वाढदिवसाच्या आणि भावी वाटचालीच्या मनापासून शुभेच्छा दिल्या. खासदार श्रीरंग बारणे म्हणाले की, “लोकांमध्ये राहून त्यांचे प्रश्न सोडविण्याचे काम लोकनेते रामशेठ ठाकूर यांच्या नेतृत्वाखाली आमदार प्रशांत ठाकूर आणि परेश ठाकूर हे दोन्ही सुपुत्र करत आले आहेत. ही स्पर्धा अत्यंत सुरेख असा अनुभव देऊन गेली.” आमदार निरंजन डावखरे यांनी कोकणच्या भूमीतही कुस्तीवर प्रेम करणारी लोकं आहेत हे या सामन्यातून स्पष्ट होत असल्याचे मत व्यक्त केले.  

नेपाळ, महाराष्ट्र राज्यासह पंजाब, हरियाणा, उत्तर प्रदेश, दिल्ली आणि इतर राज्यांतील नामांकित मल्लांनी सहभाग घेतल्याने संपूर्ण परिसरात कुस्तीचा जल्लोष पाहायला मिळाला. राष्ट्रीय व आंतरराष्ट्रीय स्तरावरील खेळाडूंनी सहभाग घेतल्याने प्रत्येक सामना अत्यंत चुरशीचा आणि रोमांचकारी ठरला. मुख्य कुस्तीमध्ये रुस्तम-ए-हिंद पै. सिकंदर शेख यांनी पंजाबचा सुप्रसिद्ध मल्ल पै. लाली चमकोर याला चितपट करून मानाची गदा पटकावली. उपमहाराष्ट्र केसरी पै. किरण भगत यांनी पै. बागा सिंघ याच्यावर मात केली. ट्रिपल महाराष्ट्र केसरी पै. विजय चौधरी यांनी हिंद केसरी पै. संदीप कुमार याला पराभूत केले. महाराष्ट्र केसरी पै. दादा शेळके विरुद्ध उपमहाराष्ट्र केसरी पै. माउली कोकाटे यांची लढत बरोबरीत सुटली. महिला गटात राष्ट्रीय पदक विजेती पै. एकता शर्मा हिने पै. अमेघा घरत हिला, उपमहाराष्ट्र केसरी पै. वेदांतिका पवार हिने पै. पलक यादव हिला, तर नेपाळची सुप्रसिद्ध मल्ल पै. रुबी थापा हिने उत्तराखंडच्या पै. कोमल हिला पराभूत केले.  

या स्पर्धेत जवळपास ७५ सामने खेळविण्यात आले. विजेत्या मल्लांसाठी तब्बल १५ लाख ५५ हजार ५५५ रुपयांची आकर्षक पारितोषिके जाहीर करण्यात आली होती. विशेष म्हणजे स्थानिक आणि ग्रामीण भागातील नवोदित मल्लांनाही या व्यासपीठावर संधी देण्यात आल्याने अनेक तरुण खेळाडूंना मोठी प्रेरणा मिळाली. स्पर्धेसाठी अत्याधुनिक सुविधा उपलब्ध करून देण्यात आल्या होत्या. भव्य मैदान, प्रशस्त प्रेक्षक गॅलरी, वैद्यकीय सुविधा, हलगीचा ताल, मर्दानी आवाजात सूत्रसंचालन, सुरक्षेची काटेकोर व्यवस्था आणि शिस्तबद्ध नियोजन यामुळे स्पर्धेचे आयोजन सर्वांच्या कौतुकाचा विषय ठरले. परेश ठाकूर यांनी गेल्या अनेक वर्षांपासून सामाजिक, शैक्षणिक, सांस्कृतिक आणि क्रीडा क्षेत्रात उल्लेखनीय योगदान दिले आहे. युवकांना प्रोत्साहन मिळावे, ग्रामीण भागातील प्रतिभेला व्यासपीठ मिळावे आणि महाराष्ट्राची पारंपरिक कुस्ती संस्कृती पुढील पिढीपर्यंत पोहोचावी, या उद्देशाने ते सातत्याने विविध उपक्रम राबवत असतात. दरवर्षीप्रमाणे यंदाही “मा. श्री. परेशशेठ ठाकूर केसरी” स्पर्धेने क्रीडाप्रेमींच्या मनावर अधिराज्य गाजवले असून, पनवेल तालुक्यातील हा क्रीडा महोत्सव आता प्रतिष्ठेची ओळख बनला आहे.