हिंदुसम्राट न्यूज
दिनांक :- 11/6/2026
"उरण: पोलीस 'सिंघम', धाबे 'धूम', दारूबंदी-FDA 'कुंभकर्ण'!"
पत्रकार / पूजा चव्हाण.
उरण, 10 जून 2026 (प्रतिनिधी) : उरणमध्ये रात्री 11 नंतर रस्त्यावर फक्त 'धाबेवाले किंग' आणि आमचे 'सिंघम' पोलीस दिसतात, अशी मिश्कील पण मार्मिक प्रतिक्रिया उरणकर देत आहेत. शहरात आणि महामार्गालगत बेकायदा चायनीज-बारवाले धाबे रात्रभर 'फुल टू धमाल' सुरू असतात. लायसन्स, वेळेचे बंधन हे शब्द तर त्यांनी 'शोले'च्या गब्बर सारखे उडवून लावले आहेत. दारूच्या नशेत 'फास्ट अँड फ्युरियस' स्टाईलने गाड्या पळवल्याने अपघातांचा सिलसिला सुरू आहे. यात उरण पोलीस मात्र 'वन्स अगेन' कारवाईचा दंडुका उगारताना दिसतात. "अहो, आम्ही 'दबंग' आहोत. गेल्या महिन्यातच 7 धाब्यांवर 'सिंघम' स्टाईलने एंट्री मारली आणि गुन्हे दाखल केले," तर उरण वरिष्ठ पोलीस निरीक्षक हनिफ मुलाणी यांनी सांगितले. "पब्लिकने फक्त 'लोकेशन' पाठवा, आम्ही 'वेलकम बॅक' करतो. रात्रीची गस्त 'टायगर जिंदा है' स्टाईलने वाढवली आहे." स्टाफ कमी असूनही, एरिया जास्त असूनही पोलीस 'एक्शन रिप्ले' सारखे धाडी टाकत आहेत. मात्र धाबेवाले दोन दिवस 'शांताबाई' होतात आणि तिसऱ्या दिवशी पुन्हा 'दे दणादण' सुरू होते, अशी नागरिकांची तक्रार आहे.
नागरिकांचा खरा संताप आहे तो 'दारूबंदी विभाग' आणि 'अन्न व औषध प्रशासन' यांच्यावर. सध्या राज्यभरात दारूबंदी विभाग आणि FDA 'स्पेशल 26' स्टाईलने छापेमारी करत आहेत. विना परवाना दारू, भेसळयुक्त खाण्यावर 'सर्जिकल स्ट्राईक' सुरू आहे. टीव्हीवर रोज अधिकाऱ्यांच्या धाडीच्या बातम्या झळकत आहेत. मग उरणमध्येच हे 'नायक' अवतरणार कधी, असा सवाल जनता विचारत आहे, असे नागरिक सांगतात. महाराष्ट्र दारूबंदी कायद्यानुसार विना परवाना दारू विक्री हा दखलपात्र गुन्हा आहे. मग हे धाबे वर्षानुवर्षे दारू कशी विकतात? राज्यात अबकारी विभाग 'ॲक्शन मोड'वर असताना उरणच्या अधिकाऱ्यांबाबत 'झोपी गेलेत का', असा खोचक सवाल नागरिक करत आहेत. अन्न व औषध प्रशासन FSSAI लायसन्सशिवाय वडापाव विकणाऱ्यांवरही कारवाई करते, असे म्हटले जाते. राज्यभरात 'मिशन फूड सेफ्टी' राबवले जात असताना उरणच्या धाब्यांवर चिकन-लॉलीपॉप, तंदूर आणि संशयास्पद 'चकणा' उघडपणे विकला जातो. त्याची 'सॅम्पलिंग' करायला 'साहेब' कधी येणार, असा सवाल उपस्थित होत आहे. "धाब्यावरचे जेवण खाऊन 'हॉस्पिटल' गाठावे लागते," असा टोला एका नागरिकाने लगावला. सध्या संपूर्ण महाराष्ट्रात FDA 'ॲक्शन मोड'वर असताना उरणात मात्र 'सन्नाटा' का, असा प्रश्न नागरिक विचारत आहेत.
वाहतूक शाखेच्या माहितीनुसार, रात्री 11 ते 3 दरम्यान झालेल्या 12 पैकी 8 अपघात 'नशा'मुळे झाले आहेत. त्यातील 6 अपघात धाब्याच्या 500 मीटर परिसरात घडले आहेत. "धाब्यातून निघालेला 'किंग' सरळ 'स्पीड ब्रेकर' तोडतो आणि आपण 'कॉमन मॅन' हॉस्पिटलमध्ये पोहोचतो," असे एक नागरिक सांगतात. रात्री कामावरून येणाऱ्या महिलांना धाब्याबाहेर टोळक्यांच्या त्रासाला सामोरे जावे लागत आहे. महिला मंडळाने इशारा दिला आहे की, पोलीस कारवाई करत आहेत, पण दारूबंदी आणि FDA कडून ठोस पावले उचलली जात नसल्याचा नागरिकांचा आरोप आहे. आता आम्हीच 'मर्दानी' बनून रस्त्यावर उतरू, असे त्या म्हणाल्या. "पोलीस 'धूम' स्टाईलने कारवाई करतात, मग हे धाबे दुसऱ्या दिवशी 'रिटर्न्स' कसे येतात? राज्यात सगळीकडे हे विभाग 'सिंघम'सारखे काम करताना दिसतात, मग उरणातच वेगळे चित्र का?" असा प्रश्न नागरिक विचारत आहेत. तोपर्यंत उरणकर पोलीसांच्या पाठीशी आहेत, पण दारूबंदी विभाग आणि अन्न व औषध प्रशासन या कारवाई करणाऱ्या विभागांकडून तातडीने ॲक्शनची अपेक्षा व्यक्त करत आहेत.
